मेचीनगर, १६ असार ।। लायन्स क्लब अफ मेचीनगरको एक वर्षे कार्यकालका लागि सन्तोष आचार्यले जिम्मेवारी प्राप्त गर्नु भएको छ । लायन्स क्लब अफ मेचीनगरको आज सम्पन्न चार्टर प्रेजेन्टेसन प्रोग्रामबाट वर्तमान अध्यक्ष शंकर थापाले आचार्यलाई आगामी एक वर्षे कार्यकालका लागि जिम्मेवारी हस्तान्तरण गर्नु भएको हो ।
संस्थाको अन्तराष्ट्रिय अभ्यास अनुसार अघिल्लो वर्ष नै नेतृत्वको टुंगो लागेको हुन्छ । उपाध्यक्ष पदको रोलक्रम अनुसार आगामी नेतृत्व चयन हुँदै जाने परम्परा भएको निवर्तमान अध्यक्ष शंकर थापाले बताउनु भयो । यसरी नयाँ कार्यसमितिमा तीन जना उपाध्यक्ष सहित २६ सदस्यीय समिति चयन भएको छ । समितिको प्रथम उपाध्यक्षमा मोहन मैनाली, द्वितीय उपाध्यक्षमा गंगालाल गुरुङ र तृतीय उपाध्यक्षमा रोशन प्रधानले जिम्मेवारी प्राप्त गर्नु भएको छ । त्यसै गरी सचिवको जिम्मेवारीमा नवराज प्रधान हुनु हुन्छ भने कोषाध्यक्षमा प्रविण थापा चयन हुनु भएको छ ।
क्लबको अन्तराष्ट्रिय अभ्यास अनुसार जुन एक तारिखका दिनबाट नयाँ समितिको कार्यकाल सुरु हुने परम्परा रहेको सचिव नवराज प्रधानले बताउनु भयो ।
सन् २०१९ जुन १ तारिखबाट मेचीनगरमा सुरु भएको लायन्स क्लबको नेतृत्व शंकर थापाले गर्नु भएको थियो । थापाको अध्यक्षतामा आयोजित प्रजेन्टेसन कार्यक्रममा लायन्स क्लब अफ विर्तामोडका पूर्व अध्यक्ष निरज ओलीले नव निर्वाचित समितिलाई बधाई तथा शुभकामना व्यक्त गर्नु भएको थियो ।
