साउन २९, काँकरभिट्टा ।। राष्ट्रिय आविष्कार केन्द्रका अध्यक्ष डा. महावीर पुन पुस्तक बिक्री अभियान लिएर मेचीनगर आउने हुनु भएको छ । साउन ३० गते (भोली) देखि उहाँ मेचीनगर आउनु हुने भएको हो ।
वीरगन्जको कृषि औजार कारखाना पुनः सञ्चालनका लागि आफ्नै आत्मकथा रहेको पुस्तक बेच्नका डा. पुन यतिबेला देश दौडाहामा हुनुहुन्छ । पुस्तक बिक्री अभियान यतिबेला झापाका विभिन्न पालिकाहरुमा सञ्चालन भई रहेको छ । यसै दौरान उहाँ मेचीनगर आउनु हुने भएको हो ।
नेपाली बैज्ञानिक डा. पुनको आत्मकथा सम्भावना, सपना र अविरल यात्रा नामक पुस्तक विक्री अभियानलाई सहजीकरण गर्न आज काँकरभिट्टा स्थित देवकोटा पार्कमा आयोजित भेलामा पुन मेचीनगर आउने जानकारी भएको हो । देवकोटा पार्क व्यवस्थापन समितिका अध्यक्ष बालकृष्ण थापाको अध्यक्षतामा आयोजित भेलामा डा. पुनले आफ्नो अभियानकै क्रममा मेचीनगर आउन चाहनु भएको कुरा सहजकर्ता केवलराम राईले बताउनु भयो । भेलामा संविधान सभा सदस्य रविन कोइरालाले डा. पुनलाई मेचीनगरमा हार्दिक स्वागत गरेर उहाँको अभियानलाई सबैले साथ दिनु पर्ने बताउनु भयो । मेचीनगरका पूर्व नगरप्रमुख विमल आचार्यले डा. पुनको अभियानलाई मेचीनगरवासीले साथ र सहयोग गर्ने बताउनु भयो । भेलाको सञ्चालन समितिका शेखर थापाले गर्नु भएको थियो भने छलफलमा रिडर्स अभियानका अध्यक्ष सन्तोष आचार्य, काँकरभिट्टा खानेपानीका उपाध्यक्ष गोविन्द गिरी, युवा समाजसेवी राजु पौडेल, ओमप्रकाश खापुङ लगायतको सहभागिता रहेको थियो ।
डा. पुनको पुस्तक विक्री अभिायन विहान ८ बजेबाट सुरु हुने र त्यस लगत्तै अभियानको तालिका निर्माण हुने आयोजकले जानकारी गराएको छ ।
