चैत्र ३०, काठमाडौं ।। सरकार गठन भएको १७ दिनमै बालेन्द्र शाह नेतृत्वको मन्त्रिपरिषद्ले पूर्ण सम्पत्ति विवरण सार्वजनिक गरेको छ । प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको विवरणअनुसार प्रधानमन्त्रीसहित १८ मन्त्रीको कुल ७८७ तोला सुन मौज्दात रहेको छ । यो रास्वपाको चुनावी वाचापत्रअनुसारको पारदर्शिताको पहिलो ठोस कदम हो ।
सुनको वितरण : कसको कति ?
| क्र.सं. | मन्त्री / पद | सुन (तोलामा) | मुख्य स्रोत |
|---|---|---|---|
| १ | प्रधानमन्त्री बालेन्द्र शाह | १९० | पत्नी सविना काफ्ले (पैतृक) |
| २ | उद्योग, वाणिज्य तथा आपूर्तिमन्त्री गौरी कुमारी यादव | १८० | रुस व्यापार |
| ३ | गृहमन्त्री सुधन गुरुङ | ८९ | पैतृक + व्यवसाय |
| ४ | श्रम, रोजगार तथा सामाजिक सुरक्षामन्त्री रामजी यादव | ८० | पैतृक |
| ५ | अर्थमन्त्री डा. स्वर्णिम वाग्ले | ४५ | विदेश जागिर + पारिवारिक |
| ६ | भौतिक पूर्वाधार तथा यातायातमन्त्री सुनिल लम्साल | ३० | पारिवारिक |
| ७ | स्वास्थ्य, जनसङ्ख्या तथा खानेपानीमन्त्री निशा मेहता | ३० | पारिवारिक |
| ८ | संघीय मामिला तथा सामान्य प्रशासनमन्त्री प्रतिभा रावल | २५ | स्वआर्जन + परिवारको उपहार |
| ९ | शिक्षा, विज्ञान तथा प्रविधिमन्त्री सस्मित पोखरेल | २५ | पारिवारिक |
| १० | परराष्ट्रमन्त्री शिशिर खनाल | २२ | पैतृक |
| ११ | महिला, बालबालिका तथा ज्येष्ठ नागरिकमन्त्री सीता बादी | १८ | विवाह |
| १२ | ऊर्जा, जलस्रोत तथा सिँचाइमन्त्री विराज भक्त श्रेष्ठ | १५ | पैतृक + विवाह |
| १३ | कानुन, न्याय तथा संसदीय मामिलामन्त्री सोविता गौतम | १५ | पैतृक + विवाह |
| १४ | संस्कृति, पर्यटन तथा नागरिक उड्डयनमन्त्री खडकराज पौडेल | ११ | पैतृक |
| १५ | सञ्चार तथा सूचना प्रविधिमन्त्री विक्रम तिमिल्सिना | करिब ७ | विवाह + पुख्र्यौली |
| १६ | कृषि तथा पशुपन्छी विकासमन्त्री गीता चौधरी | ५ | पैतृक + स्वआर्जन |
विगतका सरकारहरूले सम्पत्ति विवरण बुझाए पनि सार्वजनिक गर्न हिच्किचाउँथे । रास्वपाले भने चुनावी प्रतिबद्धताअनुसार पदभार ग्रहण गर्नुअघि नै विवरण सार्वजनिक गरेको छ । सरकारको १०० दिने कार्यसूचीमा २०४७ सालपछिका सबै सार्वजनिक पदाधिकारीको सम्पत्ति छानबिन गर्ने प्रावधान समेत छ ।
अन्य सम्पत्ति
प्रधानमन्त्री शाह: व्यक्तिगत नाममा घरजग्गा शून्य । मुख्य आम्दानी सामाजिक सञ्जाल (फेसबुक ४० लाख, युट्युब १२ लाख, एक्स ५ लाख फलोअर्स) । बैंक ब्यालेन्स १ करोड ४६ लाख ।
अर्थमन्त्री वाग्ले: १२ करोडभन्दा बढीको घर–अपार्टमेन्ट, १ करोड ९० लाख बैंक ब्यालेन्स, जलविद्युत् र बैंकमा ठूलो शेयर ।
गृहमन्त्री गुरुङ: ४ करोड ३१ लाखको शेयर लगानी, धनकुटा र चितवनमा ठूलो जग्गा ।
शिक्षामन्त्री पोखरेल: परिवारसहित २३ करोड ४१ लाख खुद सम्पत्ति ।
केही मन्त्रीले कुखुरा, बाख्रा, कुकुर समेत सम्पत्तिमा उल्लेख गरेका छन् ।
यो विवरणले बालेन क्याबिनेटलाई “पहेँलपुर” उपनाम दिएको छ । अधिकांश मन्त्रीको आर्थिक अवस्था उच्च देखिन्छ । पैतृक, विवाह, स्वआर्जन र व्यवसायलाई स्रोत देखाए पनि यति ठूलो परिमाणको सुन र करोडौंको सम्पत्तिले आम नागरिकको मनमा स्वाभाविक प्रश्न उठाएको छ ।
