भदौं १४, काठमाडौं ।। महाकवि लक्ष्मीप्रंसाद देवकोटाका बहुआयामिक प्रतिभा र जीवनमाथि चर्चा गर्न संवाद तथा विमर्श कार्यक्रम सम्पन्न भएको छ । भदौं १४ गते सनिवार देवकोटा– लुसुन प्रज्ञा प्रतिष्ठानको आयोजनामा “मैले चिनेको देवकोटा” विषयक संवाद सृङ्खला सम्पन्न भएको हो ।
संवाद सृङ्खलामा वरिष्ठ साहित्यिक एवम् नेपाल साहित्यिक पत्रकार सङ्घका पूर्व अध्यक्ष नगेन्द्रराज शर्मा प्रमुख वक्ता हुनुहुन्थ्यो । प्रमुख वक्ता नगेन्द्रराज शर्माले महाकवि लक्ष्मीप्रसाद देवकोटाको जीवनका बिबिध पाटाहरूमाथि चर्चा गर्नुभयो । महाकवि देवकोटाको छिमेकीका रूपमा रहेर र उहाँका छोराछोरीसँग सँगसँगै बाल्यकाल बिताउनुभएका वरिष्ठ साहित्यिक नगेन्द्रराज शर्माले देवकोटा गरिब थिए भनेर अनावश्यक हल्ला चलेको धारणा राख्नुभयो । उहाँले भन्नुभयो,– “देवकोटा सम्पन्न थिए । उनी गरिब थिए भनेर अनावश्यक हल्ला चलाइयो ।”
देवकोटाको कृतित्वका बारेमा समालोचक ज्ञाननिष्ट ज्ञवालीले बोल्नुभएको थियो । कार्यक्रममा साहित्यकारहरू पवन आलोक, नारायण तिवारी, विष्णुप्रसाद आचार्य, वसन्त रिजाल, आविष्कार कला, नन्दु उप्रेतीलगायतले मन्तव्य राख्नुभएको थियो । कार्यक्रममा प्रतिष्ठानका कोषाध्यक्ष कृष्ण प्रसाईं, सदस्य डा. सिर्जना शर्मा उप्रेतीको पनि उपस्थिति थियो ।
देवकोटा लुसुन प्रज्ञा प्रतिष्ठानका अध्यक्ष सुनिल कुमार पौडेलको सभापतित्वमा सम्पन्न कार्यक्रममा कार्यक्रम संयोजक एवम् प्रतिष्ठानका उपाध्यक्ष मातृका पोखरेलले औचित्यमाथि प्रकाश पार्दै गर्नु भएको कार्यकमको सहकर्ता तथा प्रतिष्ठान कार्यसमिति सदस्य सिर्जना शर्माले जानकारी दिनु भयो ।
