साउन २६, एजेन्सी ।। गाजा सिटीको अल–शिफा अस्पतालको मुख्य गेटमा रहेको पत्रकारहरूको टेन्टमा इजरायली हवाई आक्रमण हुँदा अल–जजिराका चार पत्रकारको मृत्यु भएको छ।
अल–जजिराका अनुसार मृत्यु हुनेमा संवाददाता अनस अल–शरीफ, मोहम्मद कुरैकाह, क्यामेराम्यान इब्राहिम जाहेर र मोहम्मद नुफाल रहेको बीबीसीले जनाएको छ ।
आक्रमणअघि २८ वर्षीय अल–शरीफले सामाजिक सञ्जाल एक्समा गाजा सिटीभित्रको तीव्र बमबारीबारे चेतावनी दिएका थिए। उनको मृत्यु पुष्टि भएपछि उनको अकाउन्टबाट एक पूर्व लेखिएको पोस्ट उनको साथीमार्फत प्रकाशित भएको अनुमान गरिएको छ।
इजरायल डिफेन्स फोर्सेस (आईडीएफ) ले आक्रमणको पुष्टि गर्दै अल–शरीफलाई हमासको ‘आतङ्कवादी सेलको प्रमुख’ भएको आरोप लगाएको छ । आईडीएफले उनलाई पत्रकारको आवरणमा काम गर्ने र इजरायली नागरिक तथा सैनिकमाथि रकेट आक्रमणका लागि जिम्मेवार भएको दाबी गर्यो तर अन्य पत्रकारहरूको मृत्युबारे कुनै टिप्पणी गरेको छैन।
अल–जजिराले यसअघि नै आईडीएफ माथि आफ्ना पत्रकारहरूलाई लक्षित गर्दै “उत्तेजना फैलाउने अभियान” सञ्चालन गरेको आरोप लगाएको थियो।
बीबीसीका अनुसार आक्रमणपछि प्राप्त ग्राफिक भिडियोहरूमा मृतकका शव बोकेका मानिसहरू देखिन्छन्। केहीले मोहम्मद कुरैकाहको नाम चिच्याइरहेका छन् भने प्रेस भेस्ट लगाएका एक व्यक्तिले अनस अल–शरीफको शव भएको पुष्टि गरेका छन्।
पत्रकारहरूको अधिकारका लागि काम गर्ने संस्था कमिटी टु प्रोटेक्ट जर्नालिस्ट्स (सीपीजे) का अनुसार, अक्टोबर २०२३ मा गाजामा सुरु भएको इजरायली सैन्य आक्रमणपछि हालसम्म १८६ पत्रकारको मृत्यु पुष्टि भइसकेको छ।
बीबीसीबाट
